Korrupsioni në sistemin shëndetësor, bashkohen media dhe shoqëria civile

Roli i medias dhe shoqërisë civile në mbrojtjen e të drejtave të pacientëve”. Ishte kjo tema e tryezës së rrumbullakët të realizuar sot nga shoqata “Together for Life” në kuadër të projektit “Vepro tani! Denonco korrupsionin në sistemin shëndetësor”, mbështetur nga Ambasada Amerikane në Tiranë.

Në këtë tryezë morën pjesë përfaqësues të medias dhe të Shoqatave të Pacientëve, të cilët ngritën problemet me të cilat përballen sot pacientët në sistemin shëndetësor, me synim krijimin e urave lidhëse për përmirësimin e aksesit në këtë sistem.

Tryeza 22 janar 2016 (5)

Eglantina Bardhi, drejtoreshë e shoqatës “Together for Life” u shpreh se kjo nismë vjen si rrjedhojë e problemeve të shumta që ka sistemi shëndetësor.

Besart Likmeta nga BIRN foli lidhur me pasqyrimin e lajmit shëndetësor dhe përparësinë që duhet të ketë për gazetarët mirinformimi dhe çështja e kredibilitetit për lexuesin: “Është e rëndësishme që të mos merremi thjesht me monitorim dhe me një informim të thjeshtë, por t’u hyjmë problemeve në thelb. Nëse dikush na thotë që një ilaç nuk ka efekt, atëherë duhet ta verifikojmë këtë gjë me specialistët. Duhet që pushtetarët t’i vëmë përballë fakteve, dhe jo thjesht zëra pa fakte. Nëse shkruajmë shpesh për diçka pa e faktuar, edhe njerëzit do të mësohen dhe nuk do t’u bëjë më përshtypje.

“Thonë se media është pushtet. Por në fakt është thjesht një iluzion. Pushtetin na e kanë hequr, ndaj është e nevojshme për të gjithë ne që gjithçka që sjellim, ta sjellim të plotë, të faktuar”.

Tryeza 22 janar 2016 (2)

Arlinda Gjypi, koordinatore e projektit, tha se janë bërë monitorime dhe investigime në drejtim të ofrimit të shërbimit në sistemin shëndetësor. “Kur flasim për korrupsion, nuk nënkuptojmë thjesht paratë që marrin padrejtësisht mjeku apo infermieri. Korrupsioni fillon nga lart. Mund të marrim një shembull shumë të thjeshtë: Kartën e të Drejtave të Pacientit, të cilën jo vetëm nuk e gjejmë të afishuar në spitale e qendra shëndetësore, por fatkeqësisht edhe shumë drejtues të Shëndetit Publik nuk e kanë idenë se ekziston, ndërkohë që një Kartë e tillë është miratuar 5 vjet më parë. Mungesa e njohurisë në këtë drejtim bën që njerëzit të mos i dinë të drejtat e tyre dhe të mos kërkojnë dot llogari për atë që u takon me ligj…

Aranita Brahaj, drejtoreshë ekzekutive pranë AIS/ Open Data Albania, u prezantoi Gazetarëve që Mbulojnë Çështje të Shëndetësisë dhe Përfaqësuesve të Organizatave për të Drejtat e Pacientëve disa instrumente dhe të dhëna që bëjnë të mundur informim, monitorim, shkrime gazetareske të bazuara në fakte e që lidhen me Sektorin e Shëndetësisë.

Tryeza 22 janar 2016 (4)

Olimbi Hoxhaj, drejtoreshë e shoqatës së personave që jetojnë me virusin HIV-AIDS, ngriti problemin e medikamenteve që mungojnë nëpër spitale për trajtimin e  personave të infektuar me virusin HIV, ndonëse numri i tyre sa vjen e rritet:

“Vetëm për vitin 2015 janë shënuar 87 raste të reja. Vërtet duket sikur është një grup i vogël, por kjo duhet konsideruar si gjë pozitive dhe duhet luftuar problemi pikërisht tani që nuk ka prekur një përqindje të lartë të popullatës. Për më tepër, rezulton se po rritet numri i femrave që po preken nga virusi HIV/AIDS dhe tashmë ato zënë mbi 30% të numrit të përgjithshëm, në një kohë që në fillime ishin rreth 10%.

“Personat e prekur nga HIV/AIDS mund të bëjnë një jetë normale nëse do t’u kushtohej pak vëmendje. Në fakt, ne kemi ligjin, por vuajmë shumë tek zbatueshmëria e tij”.

Asim Toro, kreu i Shoqatës së Pacientëve me Diabet foli në lidhje me çështjen e shërbimit në spitale, ku përveç ilaçeve janë të detyruar të blejnë edhe pajisje të tjera, si age apo fisha:

“Është absurde që kur një diabetik shkon në spital i duhet të blejë edhe fishat. Numri i të prekurve nga diabeti po rritet ndjeshëm, madje mund të themi se është dyfishuar, ndaj është tepër e nevojshme që të përfshihet rimbursimi për ta, sidomos kur bëhet fjalë për rastet e fëmijëve dhe të rinjve”.

Tryeza 22 janar 2016 (1)

Partizan Malikaj, Kryetar i shoqatës së Pacientëve me Hepatite deklaroi se fatmirësisht numri i të prekurve nga hepatitet shënon një rënie. Gjithsesi përbën problem fakti se personat që vuajnë nga hepatiti duhet të bëjnë analiza që kushtojnë 20 000 lekë  dhe që duhet bërë çdo tre muaj, ndërkohë që shteti nuk e ofron këtë analizë, vetëm privati. “Një person që merr një kompensim diku 12000 lekë në muaj, nuk paguan dot një analizë 20 000 lekëshe çdo tre muaj, për të marrë pastaj siç duhet mjekimin e tij. Nga ana tjetër duhet të rikujtojmë se deri më sot, asnjë nga personat që ka marrë hepatitet në spital, nuk është dëmshpërblyer nga shteti shqiptar. Në një kohë kur hepatiti C në gjithë botën konsiderohet si i shërueshëm, në vendin tonë të sëmurët me hepatit C vazhdojnë të kenë probleme shumë të mëdha.

Malikaj gjithashtu theksoi se pothuajse 50-70% e përdoruesve të drogës janë të prekur nga hepatit B.

Anisa Mima, kryetarja e Shoqatës së Pacientëve me Talasemi gjithashtu solli në vëmendje problemin e ilaçeve për të sëmurët me talasemi, të futur nga Turqia, të cilët përveçse nuk kanë efekte për trajtimin e sëmundjes. I tillë është Deferiprone, ilaç që ka krijuar efekte anësore, duke i detyruar pacientët që ta ndërpresin trajtimin. Ajo gjithashtu solli në vëmendje vështirësitë me të cilat ndeshen të sëmurët me talasemi.

Tryeza 22 janar 2016 (3)

Esmeralda Keta, gazetare e “Top Channel”, u shpreh se është shumë problematik fakti që, sipas të dhënave, 8 nga 10 pacientë që shkojnë në spital nga qendrat shëndetësore, kanë diagnozë të gabuar dhe për një gjë të tillë askush nuk mban përgjegjësi.

Takime të ngjashme priten dhe në të ardhmen.

Print Friendly, PDF & Email